Ezagutu REACHen egoitza artistikorako hautatutako artistak

Malentxo Zeberiok, Eñaut Zubizarretak, Julen Leturiondok , Liam McDonellek eta Miriam Lujuak parte hartuko dute urtarrilean Miarritzen egingo den egonaldi artistikoan, REACH proiektuaren baitan.

Urtarrilaren bigarren astean Malentxo Zeberio tolosarra, Eñaut Zubizarreta aretxabaletarra,  Julen Leturiondo eibartarra, Liam McDonell gasteiztarra eta Miriam Lujua bilbotarra elkartuko dira beste musikari askorekin, jatorri ezberdinekoak, hala nola New York, Frantziakoak edo Euskal Iparraldekoak. Miarritzeko Atabal aretoa izango da haien sorkuntza bilduma aurrera eramateko egoitza eta urtarrilaren 10ean,  Bloñ talde baxe-nafartarrekin batera eskainiko dute kontzertu bat, aste osoan landutakoa erakusteko asmoz. Kontzertua irekia da baina gonbidapenak lortu behar dira aurretik.

Musikariak lau multzotan banatuko dira eta talde bakoitzak musika koordinatzaile eta mentore izango du, egonaldia ahalik eta aberasgarri izan dadin. Atsedenaldietan inguruetako musika guneak bisitatuko dituzte.

Proiektu hau Combustible (Frantzia), Clive Davis Institute of Recorded Music (New York), Vectorealism (Milan) eta Musika Bulegoaren arteko nazioarteko lankidetza bat da, oraingoan Atabal Aretoaren (Miarritze) lankidetzarekin. REACHen helburua talentu gazteen sorkuntza artistikoa bultzatzea da eta jatorri alternatibo edota kultura minorizatudun lan artistikoak sustatzea.