“Adi Gure Musikari, adi” neguko kanpaina Argentinara iritsi da ‘Euskal musikaren laborategiarekin’

Jagoba Astiazaran, Joana Ortega eta Sebastian Ustarroz euskal etxeetan bisitan ibiliko dira abenduaren 28tik urtarrilaren 3ra bitartean

“Adi Gure Musikari, adi” kanpainak beste urrats bat egin du neguko edizioan, eta urte amaieran Argentinako lurretan ibiliko da dibulgazio-lanetan. ‘Euskal musikaren laborategia’ izenburupean, eta Jagoba Astiazaranen, Joana Ortegaren eta Sebastian Ustarrozen eskutik, Argentinako hainbat euskal etxek hurbilagotik ezagutuko dute Euskal Herriko musika.

Astiazaran, Ortega eta Ustarroz ‘Piano bat bertsotan’ ikuskizuna aurkeztera joango dira Argentinara, eta hainbat hitzaldi ere emango dituzte bertako egonaldia aprobetxatuz. Helburua: Argentinako diasporako musikari eta dantzarien artean euskal musika tradizionala zabaltzea eta, horren bidez, euskal etxeetan burutzen den kultura-transmisioa indartzea. Hitzaldi horietan aztertuko dituzte musika tradizionalaren ezaugarriak, transmititzeko bideak… Eta, gainera, hiru musikarion esperientziaren berri ere emango diete bertaratuei.

Hauxe da egutegia:

-Astelehena, abenduaren 28a: Mar de Platako Danok Bat Euskal Etxea

-Asteazkena, abenduaren 30a: Necocheako Euzko Etxea

-Igandea, urtarrilaren 3a: Chascomús pilota-elkartea

Kanpainak Euskal Herriko musikaren kalitatea eta dibertsitatea ezagutzera eman nahi du, hainbat formaturen bitartez. Kontzertu didaktikoak, solasaldi musikatuak, hitzaldiak, mahai-inguruak, lantegiak, hezteko eta jolasteko musika-jarduerak. Eta hori guztia, mota guztietako publikoentzat.

Orotariko sentsibilitateak eta estiloak lantzen dituzten musikari eta konpositoreak bildu dira urtebetez euskal musikari buruz duten ikuspegia eta euren lanak erakusteko asmoz, 2015eko “Adi Gure Musikari, adi” Neguko Kanpainan. Aurten ere, Euskal Herriko Musika Bulegoak sustatutako jarduerez gozatu ahal izango dugu Euskal Herriko zenbait kultura-eremutan, abenduan eta urtarrilean zehar.