Munduko musika-profesionalen nazioarteko topagune nagusia den WOMEX azokaren 32. Edizioa Kanaria Handian egingo da, 2026ko urriaren 21tik 25era. Edizio honetan 45 herrialdetako 40 artista baino gehiagok parte hartuko dute, eta mundu osoko 2.800 profesional baino gehiago bilduko dira. Aurten ere, euskal musikak presentzia izango du nazioarteko topagune honetan, BASQUE.MUSIC.-en eskutik. Oraingo honetan, Bi-Fadok kontzertua eskainiko du urriaren 24an, Atlantic Connections Stage agertokian, Jerónimo Saavedra aretoan, offWOMEX programazioaren barruan. Kontzertuaz gain, BASQUE.MUSIC. azokako stand batekin izango da bertan, euskal musika-proiektuen nazioarteko sustapena bultzatzeko eta sektoreko profesionalen arteko topaketa errazteko. Urtero bezala, WOMEXera bertaratzen diren profesionalei zuzendutako katalogo espezifiko bat ere argitaratuko da.   Bi-Fado Bi-Fado bi musika-tradizioren arteko topaketatik sortzen da, proiektu honetan elkargune bat aurkitzen dutenak. Agus Barandiaranek, trikitixaren energiarekin, eta Custódio Castelok, gitarra portugaldarraren adierazkortasunarekin, euskal fandango eta biribilketen bizitasuna fado portugaldarren sakontasunaren uztartzen dute. Proiektuak bi kulturen arteko elkarrizketa instrumentala proposatzen du, tradizioa, interpretazio-kalitatea eta musika-esperimentazioa uztartuz.   BASQUE. MUSIC. BASQUE. MUSIC Euskal Herriko musika sorkuntza eta industria nazioartekotzeko plataforma da; Eusko Jaurlaritzak, Etxepare Euskal Institutuak eta Musika Bulegoak lankidetzan garatutako ekimen publiko-pribatua. Womex azokaren beste edizio batzuetan, Maite Larburu (2025), Neomak (2023), Amak (2021), Xabi Aburruzaga (2020), Topa-K (2019), Kalakan (2018) eta Juan Mari Beltran (2017), musikariek parte hartu dute BASQUE. MUSIC.-ek Womexen antolatutako kontzertuetan.