‘Basque Music’ plataformak Anari eta Vulk aurkeztuko ditu Monkey Week Jaialdian

Datorren azaroaren 22tik 24ra bitarte, Monkey Week Jaialdia izango dugu Sevillan. Ezinbesteko egunak dira musika independentearen egutegian, eta, aurten ere, euskal musika entzuteko aukera izango dugu. Euskal Herriko musika kanpoan zabaltzeko Basque Music plataformak hainbat ekintzaren bidez hartuko du parte jaialdian.

Basque Music plataformak babestuta, Anarik eta Vulk taldeak zuzeneko bina kontzertu eskainiko dituzte asteburuan. Bilboko taldeak hilaren 23an, ostirala, eskainiko du lehen showcasea, 17:30ean, Jägermusic agertokian. Hurrengo egunean, 19:15ean, Vulkek Santa Clara agertokian joko du berriz. Anarik, berriz, agertoki horretan bertan eskainiko du bere lehen saioa hilaren 24an, larunbata, 18:00etan. Bigarrena, berriz, Fun Clubean, AIE agertokian eskainiko du egun horretan bertan, 22:00etan.

Vulk taldeak bere bigarren lana aurkeztu zuen aurtengo maiatzean: ‘Ground For Dogs’. Taldeak beste urrats bat egin du arrisku eta irudimen musikalaren arloan, ‘Beat Kamerlanden’ izenburuko lehen diskoaren ondoren. Afterpunk genero finituaren mugak zabaldu ditu, eta eremu progresibo, atmosferiko eta ia krautetara eraman du.

Anari Alberdik musikan egindako 20 urtetik gorako ibilbidea saritzen duen Adarra Saria jaso du berriki, eta Mikel Txopeitiak, Xabier Olazabal Drakek, Ander Narbaizak eta Mariano Hurtadok osatzen duten talde gipuzkoarreko burua da. Monkey Week aukera ona izango da haren azken diskoak entzuteko, hots, ‘Zure aurrekari penalak’ eta, berriena, ‘Epilogo bat’.

Nolanahi ere, Anari eta Vulk ez dira izango euskal musikaren enbaxadore bakarrak Sevillan. Hamargarren edizio honetan, honako hauek daude berretsita: Exnovios (hilaren 23a, ostirala, 00:30. X aretoa); Pet Fennec (hilaren 24a, larunbata, 20:45. Fun Club / AIE agertokia); Melenas (hilaren 24a, 21:45. Vinilo Rock Bar / Festival Marvin CDMX agertokia); eta Mazmorra (hilaren 24a, larunbata, 01:30. Holiday by Obbio diskoteka).

‘Basque Music’ standa

Kontzertuez eta jardunaldi profesionalez gain, Monkey Week jaialdiak gune bat eskainiko du enpresen arteko komunikazioa sustatzeko, negozio-ildoak bultzatzeko eta Monkey Market deituraren bidez musika-sektore independenteko agenteen arteko sinergia sustatzeko. Gune horretan, Basque Music plataformak stand bat jarriko du Euskal Herriko musikari lotutako sektoreei buruzko informazioa eskaintzeko.