Basque Music ekimenaren hurrengo helmugak: BIME City eta Womex

Nerabe, Meridian eta Kalakan taldeak izango dira Basque Music ekimenaren enbaxadoreak nazioarteko musikaren ekitaldirik nabarmenenetako bitan, alegia Bizkaia International Music Experience (BIME) jaialdian, Bilbon, eta Womex jaialdian, Kanaria Handiko Las Palmasen. Bi hitzordu horietan showcase bana antolatuko du Basque Musicek, Euskal Herriko artistak edo taldeak sustatzeko. Bada, aipaturiko 3 taldeak aukeratu dira emanaldi horietarako.

Iazko ekitaldian, BIME City deritzon ekimena jarri zuen martxan BIMEk. Etorkizuna duten artista berrientzako proposamena da. Hain zuzen, atal horretan jardungo dute Nerabe eta Meridian taldeek baterako showcase batean. Urriaren 25ean, ostegunean, izango da, Bilborock aretoan, 21:15ean. 2017an, Melenas eta Los Brazos taldeak aritu ziren emanaldi horretan.

BIME Pro atal profesionalean, berriz, Basque Musicek speedmeetings saio bat babestuko du euskal musikari profesionalentzat, urriaren 25ean, ostegunez. BIMEn izango diren estatuko eta nazioarteko enpresa eta eragileei euskal musika-eskaintza aurkeztea eta gure artistei eta enpresei nazioartera zabaltzen laguntzea da Euskal Herriko eta nazioarteko profesionalen arteko topaketa horren helburua.

Hurrengo egunean, ostiralean, hilak 26, Kalakanen txanda izango da, World Music Expon (Womex), munduko musika-profesionalen bilerarik garrantzitsuenean. Iparraldeko hirukoteak offWomex programazioaren esparruan eskainiko du bere kontzertua (Gabriel Rodó aretoa), 21:00etan. Horrela, Kalakanek Juan Mari Beltrani hartuko dio lekukoa, bera izan baitzen 2017ko showcaseko buru. Aurreko edizioetan bezala, Basque Musicek stand propioa izango du Womexen. Azokan parte hartzen duten euskal profesionalek eskura izango dute stand hori, beren lanak beste profesionalei erakusteko.