Ozen i Fort sorkuntza proiektua Viceko Mercat de Música Vivan (MMVV) estreinatuko da, akreditatutako profesionalentzako kontzertu esklusibo batekin. Verde Prato euskal artistak eta Clara Aguilar kataluniarrak ekainean Fabra i Coats – Fàbrica de Creació de Barcelonan bizi ondoren elkarrekin sortutako musika erakutsiko dute lehen aldiz. Hitzordua irailaren 18an izango da, 16:45ean, Església dels Dolors-en (120 lagunentzako lekua dago). Bi sortzaileen arteko lanaren premiere izango da, eraikitzen ari den soinu-unibertso baten lehen bertsioa, datozen hilabeteetan hazten joango dena. Gainera, Vic-ekiko lankidetzari esker, Oso Polita eta Daba Daba Agency euskal enpresek beren proiektuak aurkeztuko dituzte MMVVren esparru profesionalean, zuzeneko musikarako erreferentziazko merkatu horretan euskal presentzia indartuz. Ozen i Fort Musika Bulegoak eta Fabra i Coats – Fàbrica de Creaciók antolatzen dute, Bartzelonako Euskal Etxearen, Etxepare Euskal Institutuaren eta Bartzelonako Cases de la Musicaren laguntzarekin. L 'Afluent-en zuzendaritza artistikoa eta Eusko Jaurlaritzaren eta Laboral Kutxaren babesa ditu.

EKEk, Atabal aretoak, Kulturaz Kultur Kooperatibak, Bartzelonako Euskal Etxeak eta Musika Bulegoak antolatzen duten Iparhots egonaldi artistikoaren programan parte hartzeko aukeratua izan da LUMI. Donibane Lohizuneko taldeak, 2023an Ekhi Lambertek eta 2024ean RTZ Kolektiboak burutu zituzten egonaldien proiektuari segipena emango dio. Egonaldi artistikoen elkarlan honen helburua musikariei, sortzaileei eta Ipar Euskal Herriko musika eragileei proiektu berriak sortzeko eta lantzeko espazioa, baliabideak eta laguntza eskaintzea da. Bi zatitan banatutako egonaldiak bi eguneko lan saioak izango ditu: Urriaren 13 eta 14ean Dinamoa sormen gunean (Azpeitia) Azaroaren 24 eta 25ean Atabalen (Biarritz)   Horretaz gain, 2026ko lehendabiziko sei hilekoan Lumik kontzertua eskainiko du Bartzelonako Euskal Etxean. LUMI Nahia Zubeldiak (boza, makinak) eta Manu Matthysek (makinak) osatzen dute LUMI Donibane Lohizuneko elektro-pop esperimental bikotea, 2014az geroztik. LUMIk aski urrunekoak diren bi bide biltzen ditu : Nahiarena, euskal kantuen eta folk melodien ingurukoa, eta Matthysena, arrunt elektronikoa. Beren ibilbidean barna, soinua gero eta gehiago lantzen dute, eta, aldi berean, organikotasunera bideratzen. Lehen EPa 2014an atera zuten, eta lehen LPa, Itzal zikinak, 2019an, biak Moï Moï diskoetxearekin. Bezperen Dirdira azken lanean (Usopop diskak, 2022an), bikoteak jendeen eta makinen arteko miraila sekula baino gardenagoa bilakatu zuen: inoiz baino boz polimorfoagoa erritmo-konposizio organikoetan dantzan ibiliz. Bikoteak hainbat kontzertu eman ditu, bai Euskal Herrian (Dominique A aitzin Biarritzeko Gare du Midin, Sébastien Tellier aitzin Biarritzeko Atabalen), bai Parisen (Trois Baudets areto famatuan), baita nazioartean ere: besteren artean, 2018an bere musika Japoniara eraman zuen, 8 kontzertuko bira baten karietara, baita Bogotako Teatro Mayor prestigio handiko aretoan euskal musika ordezkatzeko, 2022an. 2025ean, LUMIk  bere hurrengo diskoa eta dagokion zuzenekoa prestatuko ditu, bereziki Iparhots egonaldiei esker.