Abenduko jarduerak

Abenduan beste erakunde batzuekin elkarlanean garatuko ditugun jardueren berri emango dizuegu. 2018ko proiektu-poltsan sartuta daude.

Musika Garaikidearen Jardunaldiak

Ensemble Kuraiak antolaturiko Musika Garaikideko Jardunaldien bukaera-ekitaldia egingo da Juan Crisostomo de Arriaga Musika Kontserbatorioan. Elkarte horretako kideek eskola magistrala eskainiko dute aurtengo edizioa bukatzeko.

Abenduak 1 eta 2

10:30

Akordeoiko eskola magistrala

Mie Miki akordeoi-jotzaileak eskola magistralak eskainiko ditu abenduaren 10ean eta 11n, Arrasaten. Japoniar artista hori Alemanian trebatu zen eta sariak lortu ditu nazioarteko lehiaketetan, hala nola Klingenthal-ekoan eta Annecy-koan.

Abenduak 10 eta 11

10:00etatik 14:00etara eta 15:30etik 19:30era

Arrasate / Kulturate

“Trakamatraka” / Jon Urrutia / Kontzertu didaktikoa

Mahukak jazz-erritmoan, didgeridoo bilakatzen diren jogurt-ontziak, maionesa-ontzien tapa jotazaleak, afrikar erritmoz betetako pertzak, doinu eranskorrak zabaltzen dituzten tutuak… Hori guztia aurkituko dugu “Trakamatraka” emanaldian. Jon Urrutiaren eskutik, proiektuak uztartu egiten ditu musika eta birziklapena, sormena eta irudimena, musika-aniztasuna eta ingurumenarekiko errespetua.

Tailerren eta kontzertu didaktikoen bidez, “Trakamatrakak” modu atseginean hurbiltzen du musika jendearengana, eta birziklatzea mundu hobea lortzeko bidea dela erakusten du. Ikasteko tarte alai eta interaktiboan jendea sortzaile izango da, ongi pasatuko dugu eta isiltasuna ezagutu eta itxuratuko dugu. Musika ulertu, konprenitu eta maitatzeko modu berri bat.

Abenduak 12

17:30

Barakaldo / Clara Campoamor zentroa

Musikarien arteko topaketa

Musikarik (Euskal Herriko Musikarien Elkarteak) antolatu du abenduaren 13ko topaketa hori. Agus Barandiaranen eta Olatz Salvadorren eskutik —biak ala biak lanbide-ibilbide luze, aberats eta ezberdinen jabeak dira—, jardunaldiak musikariaren jarduerari lotutako hainbat alderdi izango ditu eztabaidagai, hala nola hasiera profesionalak, musika-eszenan izan diren aldaketak eta aldaketa horiek musikariaren lanean duten eragina, autogestioa eta nazioartera zabaltzea. Horren helburua da euskal musika-eszenaren eta profesionalen egungo ahulguneak eta indarguneak bistaratzea.

Abenduak 13

19:00

Donostiako Musika eta Dantza Eskola