Europa osoko 325 kontzertu aretok parte hartu dute Open Club Day-ren laugarren edizioan

2021eko otsailaren 6an Europako zuzeneko musikaren komunitatea batu egin zen Open Club Day ekimenaren laugarren edizioa antolatzeko. Zuzeneko arteen eta batez ere zuzeneko musikaren elkartasun oihu bakarrean bilakatu zen ekimena. Zailtasunei aurre egin eta Europako zuzeneko musika aretoak proiektu arrakastatsu batean elkartu ziren.

Guztira Europa osoko 325 kontzertu aretok parte hartu zuten, inoiz baino gehiagok.

Antolatutako mahai-inguruek, streaming bidezko emanaldiek, ikastaroek, argazki erakusketek, ikus-entzunezkoek, bisita gidatuek, kontzertuek, etab-ek zuzeneko musikaren eszena bizirik dagoela erakutsi zuten. Gaur, inoiz baino gehiago, kontzertu aretoak babesten jarraitu behar dugu.

Musika Bulegoak lagunduta Ondarruko Beikozini eta Gasteizko HellDorado aretoak izan ziren Euskal Herriko ordezkariak. Bi areto hauek haurrei zuzendutako musika ikastaroak antolatu zituzten eta arrakasta handiarekin antolatu gainera: eserleku guztiak bete ziren eta ondorioz etxeko txikienek #SoldOut-aren esanahia ezagutu zuten.

Beikozinik ‘Kontzertu bat nola antolatu’ ikastaroa antolatu zuen. Bertako soinu eta argi mahaiak erabiltzeko aukera eskaini eta teknikari batek mahai hauek erabiltzen erakutsi zien gerturatutakoei. Txanda ezberdinetan antolatu zituzten egun osoa iraun zuten ikastaroek eta haur bakoitzak kontzertuen atzean ezkutatzen den lana ezagutzeko aukera izan zuen.

HellDorado aretoak musika-ekoizpenean hasteko tailerra antolatu zuen Creative Soul musika eskolarekin elkarlanean. 6 urtetik 12 urtera bitarteko haurrei zuzendutako ikastaroa izan zen eta hemen ere tokia aldez aurretik bete zen.