Musika Bulegoak euskal musikari buruzko hogeita bat trebakuntza-, sentsibilizazio- eta hedapen-proiektu bultzatu ditu

Euskal Herriko Musika Bulegoak –EHMBEk– 17 proiektu bultzatu ditu guztira 2016an, Euskal Herriko musikaren inguruko trebakuntzari, sentsibilizazioari eta hedapenari lotutakoak.

Musika Bulegoak, sortu zenetik, euskal musikari buruzko trebakuntza-, sentsibilizazio- eta hedapen-jarduerak bultzatu ditu. Jarduera horiek “Adi gure musikari, adi” kanpainetan txertatu izan dira lehenago. 2016an, Proiektu Poltsa izeneko deialdia irekitzea erabaki du MBk. Deialdi iraunkor eta mugagabea da, eta haren helburuak dira sektorearekin lankidetzan jarduteko moduak ugaritzea eta Musika Bulegoaren jarduera nagusiarekin bat datozen proposamenak indartzea.

Proiektuen bereizgarria aniztasuna da; hala, haien artean, askotariko publikoari (umeak, nerabeak, familiak, eskola-umeak…) zein sektoreko profesionalei (musikariak, enpresak…) zuzendutako proiektuak nabarmentzen dira. Horien artean badira umeentzako musikarekin egindako esperimentazio-jarduerak, euskarazko musikari buruzko musikadun solasaldiak, emakumeak musikan duen eginkizunari buzuzkoak, perkusio sintetikoko soinuak sortzeko ikastaroak, musika-argazkiari buruzkoak, musika garaikidearen konpositoreentzako tailerrak eta jabetza intelektualari eta autogestioari buruzkoak.

Proiektu Poltsak honako enpresa eta elkarte hauekin jardun du lankidetzan: Emankor Elkartea, Cuatro Barbas Kultur Elkartea, MIE Elkartea, Mugako Elkartea, Musikari Elkartea, Mikel Markez & Eñaut Elorrieta, Kuraia-Musika Garaikide Taldea, Jimmy Jazz Elkartea, Sonora Estudios, Susana Cencillo eta Garazi Kamio; Promociones Etxabarri Ibiña eta Azpikari.

Musika Bulegoa, gaur egun, euskal musikaren arloko hainbat elkarte profesionalek, enpresak eta pertsonak osatuta dago, eta arlo bereko eragile gehiago biltzeko lanean jarraitzen du.