Musikaz betetako Musikaren Nazioarteko Eguna 2020

Ekainaren 21ean ospatu den Musikaren Nazioarteko Eguna berezia izan da aurten. COVID-19ak eragin duen krisiak bete-betean jo du gure sektorea. Krisi honek agerian utzi du kulturaren sektorea babestu beharra dagoela. Baita kultura berreraikitze prozesuko zati garrantzitsu bat izan behar dela ekonomia eta gizarte politikekin batera.

Azkenengo hilabeteetan bizi izan ditugun distantzia sozialak eta konfinamenduak inoiz baino gehiago azaleratu du egunerokoan musikak gure bizitzan betetzen duen lekua. Musikak aberastu egiten du gure egunerokoa.

Asko izan dira streaming bidez zuzenekoak eskaini dituzten musikariak eta ugaritu egin dira formatu honetan kontzertuak antolatu dituzten ekimenak. Emanaldi hauei esker musikak gerturatu egin gaitu eta musikak batu egin gaitu. Formatu honen arrakastak ikus-entzuleek musikaz gozatzeko duten gogoa erakutsi du. Gainera, agerian gelditu da sektoreak eraberritzeko duen gaitasuna.

Jarduera berreraikitzeko une honetan zuzeneko emanaldiak itzultzen ari dira pixkanaka-pixkanaka. Hala ere oraindik ez dago argi betiko formatuak noiz eta nola itzuliko diren. Kontzertu aretoek itxita jarraitzen dute, auditorioek eta antzokiek neurri zorrotzekin hasi dute udako denboraldia, musika jaialdiak eta jaietako zuzeneko emanaldiak bertan behera gelditu dira. Agerian gelditu da emanaldi guzti hauen atzean dagoen sarea: batez ere enpresa txikiek eta autonomoek osatzen dutena. Horregatik, krisia hasi zen egunetik, musikaren sektore guztiarentzat laguntza bereziak eskatu ditugu eta nabarmendu egin dugu orain arte dauden laguntzak mantentzea ezinbestekoa dela. Ez dugu ahaztu behar krisia hasi aurretik eta bere kabuz eten zuela bere lana musikaren sektoreak.

Funtsezkoa da zuzeneko emanaldiak ez estigmatizatzea eta ezeztatze sistematikoak gelditzea eskatu dugu jardueraren normalizazioa eskatuz. Horretarako ezinbestekoa da sektoreko ordezkarien bitartekaritza. Eta horretan ari da Musika Bulegoa Reset plataformaren bitartez eta Zuzeneko Arteak osatzen duten elkarte ezberdinekin kolaboratzen. Kulturaren sektore guztiak batu egin gara elkarlana bultzatzeko dugun borondatea erakutsiz. Borondate hori eskatu diegu gainera instituzio publikoei: musika emanaldietarako zituzten aurrekontuak mantentzeko eta entitate pribatuekin kolaboratzeko eskatuz.

Musikaren Nazioarteko Egunaren aitzakiarekin hainbat zuzeneko emanaldi antolatuko dira.  Eta beste asko ezin izango dira antolatu. Musika Bulegoak musikaz betetako Musikaren Nazioarteko Egunaz gozatzeko proposamena luzatzen du: bakarrik, lagunekin, familiarekin edo ezezagunekin. Musikak gure bizitzak aberastu egiten dituelako.