Oreka TX eta La Marimba taldeek bere sustraiak batu dituzte Lehioa abestian

Abestia BIME Bogotan 2023. urtean egindako BIME Saioen baitan sortu zen, BASQUE. MUSIC.-en laguntzarekin eta Oso Politaten kuradurarekin

Hasiera batean gai tekniko batzuk jorratzeko harremanetan jarri ondoren, 2023ko maiatzean Oreka Tx eta La Marimba taldeak Bogota hiriko Estudio Naranja grabaketa estudioan sartu ziren konposaketa saio bat egin eta partekatzeko. Hitzordu horretatik sortu zen Lehioa, Euskal Herriko eta Dominikar Errepublikako musika tradizionalaren arteko fusio ederra.
Oreka TX eta La Marimba taldeek euskal instrumentu tradizionalen erritmoen eskutik beldurrik gabe bizitzera gonbidatzen gaituzte. Txalaparta, alboka, eta Mariola Pichardoren ahots-melodiak dira protagonista BIME Saioen espiritua islatzen duen abesti argitsu honetan. BIMEk bultzatutako laborategi artistiko honek aukera ematen die hainbat estilo eta tokitako artistei denbora eta talentua partekatzeko.

Kantu berriaren protagonistek nabarmendu dute magiaren zati handi bat topaketa hori aurrez prestatu gabe eta elkar ezagutu gabe antolatzean dagoela. Elkarrekin lan egiteko aukera ematen duen espazioa honetan bakoitzak bere benetakotasuna, hizkuntza eta nortasuna eman dezake, horrela, elkarbizitza artistiko hutsetik sortzen diren abestiak sor daitezen.

Sorkuntza partekatu eta aberaste kulturalaren aldeko ekimen honen potentzial handiaren beste adibide bat da Lehioa, eta BIMEren edizioek 2022tik aurrera Oso Politaren (Last Tourren 360º zigilua) kuradurarekin hartu dute, formatua berrituz eta hobetuz.

Saio hau, zehazki, BASQUE. MUSIC.-en laguntzarekin egin zen. BASQUE. MUSIC. Musika Bulegoak koordinatutako proiektua da, Etxepare Euskal Institutuarekin eta Eusko Jaurlaritzarekin lankidetzan. Helburua euskal sormena, kultura eta artearen sentsibilizazioa eta ikusgarritasuna areagotzea da.