Musika Bulegoak 51 kolaborazio proposamen jaso ditu

Euskal Herriko Musika Bulegoa Elkarteak  euskal musikaren inguruko prestakuntza, sentsibilizazioa eta zabalkundea jorratzeko 51 proiektu jaso ditu guztira. Balorazio-batzordeak proiektu horiek guztiak aztertu eta onartutako proposamenen berri emango du; hala, ekainetik aurrera lantzen hasteko moduan egongo dira.

Sortu zen unetik bertatik, Musika Bulegoak Euskal Herriko musikaren inguruko jarduerak babestu ditu. Hauxe da ekimenaren helburua: euskal musikagintzaren inguruko prestakuntza, sentsibilizazioa eta zabalkundea helburu duten sektoreko eragileen proiektuak bultzatzea.

“Urtetik urtera haziz doa aurkeztutako eragileen eta proposamenen kopurua; halako jarduerak jorratzeko interesa ez ezik, Musika Bulegoak eskuratu duen gero eta erreferentzialtasun handiagoa ere islatzen du horrek», adierazi du Jabiertxo Andiarenak, Musika Bulegoko Idazkaritza Teknikoaren koordinatzaileak.

Aurkeztutako proposamen guztietatik % 37,8 sentsibilizazioaren alorrekoak dira, eta % 31,5 prestakuntzaren alorrekoak; beste % 11 zabalkundeari lotutako jarduerak dira, eta gainerako % 19,7a, zeharkako izaera duten proposamenak. Hogeita hamar eragilek baino gehiagok hartu dute parte proposamenetan.

Nabarmena da aurkeztutako proiektuen aniztasuna:lantegiak, mintzaldiak, mahai-inguruak, masterclassak, topagune profesionalak, kontzertu didaktikoak, familiei eta haurrei zuzendutako jarduerak, argitalpenak…Balorazio Batzorde batek baloratuko ditu proposamenak Zuzendaritza Batzordearekin batera, baita kolaboratzeko modua ere, ontzat jotzen direnak ekainetik aurrera jorratzen hasteko.