LIVEMX europako musika-sektoreari laguntzeko proiektu berria

2023/07/10

Inova+, Live DMA eta European Music Exporters Exchange-ek (EMEE) LIVEMX proiektu europar berria abian jarri dute.

LIVEMXek, Europar Batasunak kofinantzatuta, musika-sektore askotarikoagoa eta iraunkorragoa sustatu nahi du Europan. Proiektuaren zati nagusi bat finantzaketa-plan bat da, Europako musika-ekosistemaren barruan premia oso espezifikoei aurre egiteko diseinatua. Proiektuan zehar, hiru deialdik musikako profesionalak bultzatuko dituzte lidergo-papera hartzera, sektorearen berehalako erronkei erantzuteko. COVID-19aren pandemiaren ondoren, musikarien mugaz gaindiko mugikortasuna eta industriaren iraunkortasuna bezalako erronkek alderdi interesdun guztiak inplikatuko dituen ikuspegi bat eskatzen dute. Finantzaketa-planak 4 milioi euroko finantzaketa aurreikusten du, eta musikaren sektoreko 90 onuraduni lagunduko die, hiru gai espezifikotan oinarritutako dirulaguntzak eta gaikuntza-ekintzak emanez: “musikaren esportazioa”, “kontzertu aretoak” eta “zirkulazio eta konpromiso digitalak”.

Proiektuaren helburuak lortzeko, LIVEMXen partzuergoa gaitasun eta esperientzia handiko hiru erakundek osatzen dute: INOVA+, Live DMA eta EMEE. Basque. Music. eta Kultura Live, EMEE eta Live DMA elkarteetako kide dira eta bi bazkidetzak Musika Bulegotik koordinatzen dira.

INOVA+ aholkularitza-zerbitzuen hornitzaile aditua da berrikuntzaren, teknologiaren eta enpresa-espirituaren arloetan. 25 urte baino gehiagoko esperientziarekin, enpresak hainbat proiektutan parte hartu du, berrikuntza bultzatuz eta lankidetza sustatuz, bereziki kultura- eta sormen-industria eta -sektoreetan. INOVA+ MusicAIRE proiektuaren koordinatzailea ere bada, Musikaren Europako Kontseiluarekin gauzatua.

Live DMA, 2012an sortua, Europako sare bat da, eta zuzeneko musikaren 3.000 lokal, klub eta jaialdi baino gehiago ordezkatzen ditu, 16 herrialdetako 20 elkarte nazionalen bidez. Oso sektore zatikatua egituratzean eta balio partekatuei buruzko ahots desberdinak biltzean, Live DMAk zuzeneko musikaren Europako eszena babestu nahi du, musika-ekosistema bidezkoago eta iraunkorrago baterantz.

EMEE 27 herrialdetako musika esportatzeko 32 bulego nazional eta erregionalek osatutako irabazi-asmorik gabeko elkartea da. Europako musika-sektorea indartzea du helburu, musika-aniztasuna eta ikusgarritasuna sustatuz, eta Europan eta Europatik kanpo mugikortasuna bultzatuz. Erakundeak erraztu egiten du hori, kideen informazioa eta esperientzia trukatuz, bai eta musika-industriako kideen eta/edo beste erakunde batzuen arteko proiektu-ekimenen bidez ere.

Partzuergoak lineako inkesta bat argitaratuko du laster, LIVEMX plana egokia eta ondo egituratua izatea bermatzeko moduari buruzko iritziak jasotzeko. Gainera, urte amaieran proiektuen lehen deialdia argitaratuko da.